SUBLING nagpahimangno si Mayor Sara Duterte-Carpio Miyerkules sa hapon, Agusto 5, 2020, ang katawhan, ilabi na kadtong nanimuyo sa mga ubos nga bahin sa siyudad, nga kanunay nga bahaon tungod sa padayong pagdaut sa panahon tungod sa nasiplatan nga low pressure area (LPA) sa may Malungon, Sarangani Province.

Gitambagan sa mayor ang katawhan nga mamati sa 87.5 Fm Davao City Disaster Radio aron nga masayran nila ang katikaran kung kanus-a mopahigayon og mga forced evacuation pinaagi sa Davao City Disaster Risk Reduction Management Office.

Kini human nga daghang mga barangay dinhi sa siyudad sa Davao ang nabahaan niadtong Martes sa gabii, Agosto 4.

Forced evacuation daling gimando sa Davao City Disaster Risk Reduction and Management Office (CDRRMO) sa pipila ka mga molupyo daplin sa kasapaan tungod sa pagbundak sa ulan, ilabi na sa kabukiran hinungdan nga mitaas ang libel sa tubig.

Niawas ang Barangay Balengaeng Creek hangtud nga midagayday kini hangtud sa Talomo River hinungdan nga daghang mga molupyo ang naapektuhan.

Grabeng gibaha ang mga barangay sa Talomo Proper, Los Amigos, Catalunan Pequeño, Tugbok ug Riverside.

Hinuon bisan pa niini gimando gihapon sa BDRRMC ngadto sa mga bakwit nga iimposar ang physical distancing ug magsul-ob kanunay sa face mask. (WGM uban sa taho ni RGL)