PATAY ang usa ka 42-anyos nga lalaki human manggukod og baki sa dihang aksidenteng nahulog sa busay sa Barangay Salapawan, Paquibato District, dakbayan sa Davao.

Base sa impormasyon, nasayran nga nanawag si Datu Rudy Adang, Indigenous Peoples Mandatory Representative (IPMR) sa hotline sa Police Station 7 hapon niadtong Biyernes, Pebrero 28, ug nagpahibawo bahin sa hitabo didto sa Kiminlao waterfall sa nahisgutang barangay.

Sa inisyal nga imbestigasyon sa Paquibato Police Station, nasayran nga mga bandang 9 sa gabii niadtong Huwebes, Pebrero 27, ang biktima nga nailhan nga si Darwin Torres Rasay, molupyo sa Purok 23, Lubugan, Toril, Davao City ug iyang higala nga si Jimmy Onsad Man-olugan, 24, lumad ug molupyo sa Purok 1, Barangay Salapawan, Paquibato District, namaki sa maong busay mga usa ka kilometro ang gilay-on sa kinapusoran sa barangay.

Samtang naggukod og baki sa bakilid nga bahin, aksidente nga nadakin-as ang biktima ug nahulog sa busay nga dunay gilawmon nga 30 metros ug nabunal ang ulo sa bato nga maoy hinungdan sa hinanali niyang kamatayon.

Patay nga lawas sa biktima gihatud ngadto sa Rivera Funeral Parlor sa Licanan, Panabo City.

Giawhag sa Paquibato PNP ang pamilya sa biktima nga mohimo og otopsiya sa patay nga lawas aron masayran kon wala bay foul play sa maong hitabo.