DAVAO DEL SUR -- Way natalang damyos ang magnitude 4.7 nga linog nga mitay-og, alas 2:51 sa kaadlawon, Biyernes, Hulyo 10.

Sa taho sa Philippine Institute of Volcanology and Seismology (Phivocs), natala ang episentro sa linog sa gilay-ong 11 kilometros gikan sa habagatang sidlakan sa lungsod sa Kiblawan.

Anaa sa 16 ka kilometros ang gilawmon sa linog ug tectonic ang origin.

Tungod niini, nasinati ang instrumental intensities sa mga mosunod nga lugar:

* Intensity III - Kidapawan City, Koronadal City, Tupi, South Cotabato; Malungon, Sarangani

* Intensity II - Alabel, Sarangani

* Intensity I - General Santos City

Ang pagtay-og nitukma sab sa linog niadtong Hulyo 10 sa miaging tuig nga dunay magnitude 4.7 sa Mindanao diin ang episentro natala sa Makilala, North Cotabato.

Human niini, nasundan pa og mga magnitude 5 nga linog sa bulan sa Agosto, tulo ka kusog nga linog sa bulan sa Oktubre ug ang pinakakusog nga magnitude 6.9 niadtong Disyembre 15, 2019 nga misamot pagguba sa daghang istraktura sa Mindanao. (Orlando B. Dinoy)