NAGDANGOY-NGOY nga nagpa-blotter sa Talomo Police Station ang usa ka bana human iyang nasayran ug nakita nga gihalukan ang iyang asawa sa kabit niini daplin sa highway sa Jose P. Laurel Avenue niadtong miaging adlaw.

Sa blotter nga natala sa presinto tres, nasayran nga wa magdahom nga makita ni Renato, 33, ang iyang asawa nga si Helen, 26, usa ka call center agent, nga uban ang kabit niini nga si alyas Oscar daplin sa highway.

Gisaysay ni Renato nga wa siya kahimo nga moduol sa duha aron di siya maka-iskandalo sa publiko ug iya nalang kining gipa-blotter.

Giingon nga si Oscar pa ang nagdala sa bag ni Helen ug sa dihang mosakay na kini og dyip, naghalok pa sila.

Hilabihan ang kahiubos ni Renato sa pagluib sa iyang asawa nga una na niyang nahibal-an gikan sa iyang mga higala, apan wa lamang niya kini gitagad kay wa siya nakasakop sa tinuod nga hitabo.

Sanglit dunay numero sa babaye sa blotter gisulayan og kuha sa SuperBalita ang kabahin niini diin iyang gitug-an nga nahimo niya ang pagluib gumikan di kabalo nga mo-sex ang iyang bana kaniya.

"Gikapoy napod ko niya, nawad-an ko'g gana sa akong kaminyuon kay di ko malipay niya kung naa nami sa kama. Di siya kabalo," ingon ni Helen, kinsa nagpatago sa iyang kompleto nga pangalan.

Ang maong kaso anaa na sa Investigation Section sa Talomo Police Station gumikan pursigido ang bana nga mopasaka og kaso sa iyang asawa.