CENTRAL MINDANAO -- Patay ang municipal councilor sa gilusad nga drug buy-bust operation sa mga sakop sa Philippine Drug Enforcement Agency (PDEA) sa Bangsamoro Autonomous Region in Muslim Mindana (BARMM) ala 1:40 sa hapon niadtong Dominggo, Agosto 16, sa Cotabato City.

Naila ang konsehal nga napatay nga si Jaymar Nandang sa Northern Kabuntalan, Maguindanao Province.

Gibutyag ni PDEA-BARMM Regional Director Juvinal Azurin nga milusad sila og buy-bust duol sa gipuy-an sa suspek sa Purveyor Subdivision, Barangay Rosary Heights 11, uban ang Cotabato City Police Office, Marine Batallion Landing Team (MBLT-12) ug City Drug Enforcement Unit (CDEU).

Apan nakamatikod si Nandang nga mga awtoridad ang iyang kasabot hinungdan nga nagpabuto siya sa iyang armas ug midagan pasulod sa iyang balay.

Mibalos ang mga PDEA-agents hinungdan nga grabeng naangol ang suspek.

Nadala pa si Nandang sa Cotabato Regional and Medical Center (CRMC) apan gideklara siyang dead on arrival human makaangkon og lima ka samad pinusilan sa lawas.

Narekober gikan sa posisyon sa suspek ang usa ka kalibre .45 nga pistola, 1 magazine, mga bala, 20 gramos nga shabu nga nagkantidad og P136,000, cellphone, buy-bust money ug mga personal nga kagamitan.

Gikompirma ni Azurin nga si Nandang tulo na ka bulan nga ilang gipanid-an ug apil sa ilang high value target. (EEF)