MOKABAT kapin kon kulang P1.5 milyon ang kantidad sa shabu nga nasakmit sa Buhangin Police Station gikan sa magsuong pusher nga nasikop atol sa buy-bust operation didto sa Sampaguita Street, Barangay Buhangin Proper, Davao City alas 8 sa gabii niadtong Sabado, Septiyembre 19, 2020.

Mga suspek gipang-ila sa Buhangin Philippine National Police (PNP) nga sila Jhong Bustamante ug Kenneth Bustamante, pulos hamtong ang pangedaron.

Sumala ni Police Major Estrello Ramiso, hepe sa Buhangin PNP, dugay-dugay na nilang gipanid-an ang lihok sa mga dinakpan hangtud nga miabot sa punto nga mobaligya na sila og shabu.

"Bigtime gyud ni sila. Masuta sab sa gidaghanon sa atong mga nakumpiska gikan sa ilang posisyon," ingon ni Major Ramiso sa mga tigbalita.

Moihap sa 17 ka mga pakite sa gituohang shabu ang nakumpiska gikan sa mga dinakpan ingon man ang marked money ug mga cellphone.

Pangulipas sa mga suspek, wala kuno silay shabu ug dili sila gabaligya, gagamit lamang kuno sila, apan dili sila kalimod sa mga ebidensiya nga gigunitan karon awtoridad gikan sa ilang posisyon.

Giandam na ang kaso nga ipasaka sa managsuon didto sa korte.