MILANAT lamang og halos 10-minutos ang pagbotar Lunes, Mayo 13 ni Presidente Rodrigo Duterte.

Ang pangulo miabot mga alas 4:30 sa hapon sa Daniel R. Aguinaldo National High School ug didto mibotar sa Precinct 1245-A, Cluster Number 361.

Human sa iyang pagbotar, nagpahulagway ang presidente uban ang mga Board of Election Inspectors (BEIs) nga nagsilbi sud sa presinto.

Paggawas sab ni Duterte sa iyang presinto, milingkod kini sa kahoy nga armchair nga una niyang gilingkuran atol sa pagboto niya dihang nagpapili siya isip presidente ug iyang gilagdaan.

Sa pikas bahin, sa hamubo sa press conference human sa iyang pagbotar, gibutyag sa Pangulo nga pabilin niyang gina-update ang kapulisan ug kasundaluhan aron masiguro ang hapsay nga piniliay.

“I have yet to receive something that is more than just the ordinary, vote buying, violence, but nothing of a big one probably that disturbed the conduct of election,” ni Duterte nga unang midumili sa pagtubag sa pangutana sa usa ka media tungod di niya buot masaypan sa pagtubag.

Samtang sa kaso sa mga nangaguba nga vote counting machine (VCM) gibutyag sa presidente nga ihatag niya sa Comelec ang pag-atiman niini.

“Let the Comelec explain first to the people, then initiate an investigation.”

Sa laing bahin, timprano kaayong mibotar si Davao City Mayor Sara Duterte-Carpio didto sa DRANHS.

Samtang si Sebastian “Baste” Duterte kinsa maoy mahimong bise mayor sa dakbayan sa Davao ang mibotar didto sa usa ka tunghaan sa Catigan, Toril, dakbayan alas 3 sa hapon.

Si Paolo Duterte ang kanhi bise mayor kinsa nagpapili pagka-Kongresista sa unang distrito sa dakbayan ang mibotar alas 5 sa hapon didto sa Catalunan Grande Elementary School.

Mitubag si Mayor Sara sa pipila ka mga pangutana sa media, apan si Paolo ug Sebastian wa na kini nagpahinabi. (Rhona Goc-ong-Villariasa)