NAKADAWAT ang Police Regional Office (PRO)-Davao niadtong Huwebes og 25 ka patrol cars gikan sa Philippine National Police (PNP) headquarters aron nga mapalig-on pa ang ilang operasyon sa Davao region.

Si Police Chief Superintendent Manuel Gaerlan, PRO-Davao regional director, nagpasalamat sa liderato sa PNP lang sa dugang patrol cars.

“These newly-donated patrol cars would help the police to be more competent to respond, and give more training to our personnel and other constituents,” tin-aw ni Gaerlan.

Dugang pa niya nga kini nga mga behikulo nagtinguha aron nga makatubag og dali sa mga insidente, aron dugangn ang police visibility ug pagpakgang sa kriminalidad.

Base sa datus, ang patrol car units iapud-apod ngadto sa nagkadaiyang yunit sa pulis.

Ang Davao del Norte Provincial Police Office (DNPPO) modawat og 10 patrol cars samtang ang Davao Oriental dunay siyam, Davao Occidental duha ug usa alang sa Compostela Valley, Davao del Sur, PRO regional headquarters ug sa Davao City Police Office.

Si Special Assistant to the President Secretary Christopher “Bong” Go, kinsang mensahe gideliber ni Undersecretary Nelson Suarez, nagsulti nga mga behikulo nahisubay sa Philippine Development Plan (PDP) ni Presidente Rodrigo Duterte alang sa 2017-2022.

Kini sab ang pagtuman sa saad sa Presidente aron suportahan ang war on drugs.

Subay sa PDP sa Presidente, ang bag-ong multi-purpose “Bagani” Hall natapos na didto sa PRO-Davao. Gikanayon ni Gaerlan nga kini maoy handumanan sa pagpasalamat ngadto sa mga pulis tungod sa ilang panahon ug dedikasyon.

Dugang pa niya nga ang bag-ong website gilunsad sab atol sa kalihukan. (JCR/Abigail Joyce C. Cahiwat MSU- Marawi Intern)