DAVAO DEL SUR -- Gipasidan-an sa Davao del Sur Police Provincial Office (DSPPO) ang publiko nga mag-amping sa pag-apil sa mga investment scheme nga ania sa probinsiya.

Sumala ni Colonel Alan Manibog, police provincial director, nga angayang seguruhon sa matag indibiduwal kon lehitimong kompaniya nga ilang giapilan aron di mabiktima sa mga scammer pag-abot sa panahon.

Daghan na sa mga molupyo sa probinsiya ang nahaylo sa mga kompaniya nga nagtanyag og 30-400 porsiyentong tubo sa ilang kapital pag-abot sa usa ka bulan.

Apan, luyo sa pasidaan sa kapulisan padayon ang katawhan nga wa maminaw kanila.

Sumala ni Erlinda, 38, taga Matanao nga di angayang manghilabot ang gobyerno kay kaugalingon nilang kuwarta ang ilang gigamit sa pag-invest.

Samtang giangkon sa kapulisan nga di sab sila makahimo og lakang sanglit way bisan usa ka indibiduwal ang miduso og reklamo batok sa investment scheme.

Sa Davao City, hugot nga gibantayan sa anti-scam unit nga di makasulod sa ilang lugar ang mga investment scheme. (Orlando B. Dinoy)