DAVAO DEL SUR -- Nagpadala og dugang personahe ang Davao del Sur Police Provincial Office (DSPPO) gikan sa headquarters sa Barangay San Agustin, siyudad sa Digos niadtong Lunes.

Mokabat sa 106 ka mga personahe ang gipadala isip dugang puwersa sa Revitalized Pulis sa Barangay (RPSB) nga duna lay 67 ka buok sa mga kabarangayan.

Adunay unom ka mga barangay sa probinsiya ang una nang gibutangan og mga sakop sa RPSB, partikular sa Barangay Sibulan, Sta. Cruz, Barangay Kapatagan, Digos City, Barangay Kimlawis sa Kiblawan, Barangay Colonsabac ug Dongan Pekong sa Matanao, Davao del Sur.

Apan laing pito pa ka barangay ang gibutangan og mga sakop sa RPSB ug nadugang ang Barangay Saliducon sa Sta. Cruz, Barangay Goma ug Balabag sa Digos City, Barangay Darapuay, Sibayan ug Managa sa Bansalan, ug Barangay Asbang sa Matanao.

Ang nasampit nga mga barangay maoy naila kaniadto nga pundohanan sa mga rebeldeng New People's Army kinsa nakahatag og suliran sa mga molupyo sanglit apektado ang ilang panginabuhian.

Samtang si Police Colonel Alberto Lupaz, director sa DSPPO, nagpahinumdom sa mga sakop sa RPSB nga buhaton ang ilang misyon gikan sa ilang kasing-kasing ug ilang presensiya maoy timailhan sa tinuod nga pagserbisyo aron masinati sa katawhan ang pagmahal sa gobyerno ngadto kanila. (Orlando B. Dinoy)