ARON mas madugangan pa ang kompiyansa sa kaugalingon diha sa mga nagkadaiyang sugilanon sa kinabuhi, mas maayong matisok sa hunahuna ug kasingkasing sa nagtubong kabataan kung unsaon mobarog sa kaugalingon isip lider sa komunidad ug bisan sa pamilya.

Gumikan kay tumong sa matag tunghaan nga mohulma og kabag-ohan sa kinabuhi sa usa ka estudyante aron maoy gamiton sa umaabot nilang karera sa kinabuhi, ang MATS College of Technology sa Davao City mipahigayon og duha ka adlaw nga leadership training.

Ang maong training kabahin sa National Service Training Program-Civic Welfare Training Service (NSTP-CWTS) sa maong tunghaan nga gipangunahan sa Philippine Red Cross Youth-Davao City Chapter ug ni NSTP-CWTS adviser-coordinator Berneth Divinagracia-Tan.

Malipayong misalmot ang mga tinun-an sa maong tunghaan dala sa kaikag sa kaugalingon nga madugangan ang pagsalig, determinasyon ug paglaum sa matag hagit sa kinabuhi.