DIGOS CITY - Gitahasan karon sa City Anti-Drug Abuse Council (Cadac) ang mga opisyal sa barangay nga motabang sa mga nahimong biktima sa ilegal nga druga ilabi na niadtong nabutang sa ilang listahan sa Barangay Drug Abuse Council (BADAC).

Subling mohimo ang Cadac og "retokhang" sa mga una nang nanurender kaniadto aron masuta ang kahimtang niini.

Sugod Lunes, Enero 25, 2021, gipatuman ang "retokhang" sa mga barangay sa Dawis ug Aplaya ug isunod sab karong adlawa ang mga barangay sa Binaton ug Soong.

Matag adlaw nga himuon sa Cadac ang maong aktibidad diin gilaumang matapos sa Pebrero 10, diin adtuon niini ang 26 ka mga barangay sa dakbayan.

Nakahan-ay na ang mga mosunod nga lugar sa matag adlaw nga petsa sama sa Binaton; Soong; Cogon; Sinawilan; San Miguel; San Jose; Igpit; Kiagot; Lungag; San Roque; Kapatagan; Matti; San Agustin; Tres de Mayo; Tiguman; Zone 1,2,3; Dulangan; Goma; ug Ruparan.

Buot ni Mayor Josef Cagas, pamuno sa Cadac, nga hingpit nang malimpyo ang ilegal nga druga sa dakbayan ug gitahasan sab ang mga awtoridad nga palawman pa ang intelligence monitoring aron daling masayran kinsa ang mga tawong padayon sa ilegal nga aktibidad.