KIDAPAWAN CITY -- Gihangyo karon sa militar ang lokal nga panggamhanan sa Magpet, North Cotabato nga ipasirado ang usa ka tulunghaan.

Ang Mindanao Interfaith Services Foundation Incorporated o MISFI academy sa Barangay Datu Celo, sa Magpet, gitumbok sa mga sundalo nga giingong nagsuporta kini sa walhong grupo o New People's Army (NPA).

Gibutyag mismo ni 72nd Infantry Battalion Philippine Army Commanding Officer Lieutenant Colonel Rey Alvarado nga left-leaning organization sa mga komunista ang MISFI.

Gigamit ang tulunghaan sa mga NPA sa pagrekrut sa mga kabataan nga muanib sa ilang pundok.

Gidugang ni Alvarado nga dunay mga ginikanan ang nagreklamo gumikan gidala ang ilang mga anak sa kabukiran nga walay pagtugot sa ilaha.

Gikabalaka sa militar lakip na ang mga IP Leaders sa Magpet sa posibleng mahitabo sa mga kabataan.

Gikomperma sab ni Alvarado nga walay school ID ang MISFI nga nagpamatuod nga rehistrado sila sa Department of Education (DepEd) central office.

Samtang giklaro sab ni Cotabato Schools Division Superintendent Isagani dela Cruz nga 2016 pa dunay school ID ang MISFI.

Apan hangtud karon natanggong pa sa DepEd Regional Office ang permit to operate sa MISFI.

Walay nakita sab si Dela Cruz nga nagpamatuod nga left-leaning school o nagsuporta ang maong tulunghaan sa mga rebelde.

Sa taho sa private school coordinator sa DepEd nga gisunod sa MISFI ang tanan nga mandato sa aspeto sa edukasyon.

Ang MISFI academy sa rgy Datu Celo, Magpet ang annex school sa MISFI academy sa Barangay Kisante, Makilala, Cotabato nga gitumbok sab sa militar nga left-leaning school sa mga NPA. (Edgar Fuerzas)