MGA Dabawenyong manlalangoy makiglumba sa 42nd Southeast Asia (SEA) Age Group Swimming Championships sa Hulyo 6 hangtud 8 didto sa Trace College Los Baños sa Laguna.

Sila Matthieu Tao, Ivo Nikolai Enot, magsuong Yarra John Martin ug Rizbon Martin, uban sila Amoguis sisters, Liaa Margarette ug Loa Micah, maoy kabahin sa Team Philippines sa kompetisyon nga makalaban nila ang pambato sa Brunei, Vietnam, Malaysia, Indonesia, Laos, Singapore, Cambodia, Myanmar, Thailand ug Timor-Leste.

"Based sa performance nila sa training nila, may chance naman mag medals ang mga bata. I-checked the last year's result sa SEA Age-Group, talagang may chance na maka-finals," pahayag ni assistant coach Haroon Cali sa Facebook chat.

Niadtong milabay nga tuig, napakyas ang Mindanao swimmers nga mahimong kuwalipikado.

Dugang ni Cali nga miadto sila sa Manila aron magbansay sulod sa duha ka semana human ang lima ka adlaw training sa Tagum City.

Apan regular sila nagapraktis sa Holiday Gym and Spa.

Ang tim molupad padulong Laguna karong adlawa. (MRP)