ANG defending champion nga Philippine College of Technology (PCT) nagpabiling wa pa'y pildi human sa duha ka duwa sa nagpadayong 15th Acosta Cup ladies' open football tournament sa Tionko Football Grounds, Ecoland, Davao City.

Ang PCT nga pambato sa GGS Enterprise, nakalahutay kontra Sikat Alab sa iskor 2-1 niadtong Dominggo, Oktubre 28 human nakaposte sab og daug, 6-0, batok Rizal Memorial Colleges (RMC) Bulldogs aron masiguro ang 2-0 standings sa kompetisyon nga gi-organisa sa opisina ni councilor Mabel Sunga-Acosta.

Niadtong milabay'ng tuig, ubos ni Coach Alvic Troyo, nakuha sa PCT ang titulo human giilog sa 2016 kampeyon D' Davao Survivors (DDS) sa iskor 3-0, sa finals.

Samtang ang CR7 Foodtruck anaa sab sa unang puwesto nga dunay 2-0 rekord.

Gidemolis sa CR7 ang Bulldogs 7-0, niadtong Dominggo.

Ang kompetisyon dulaon og balik karong Sabado ug Dominggo sa parehong venue. (MRP)