ANG Philippine National Police (PNP) Lady Patrollers nakabulsa sa titulo sa Governor Beach Volleyball Women's Invitational Cup sa Menzi Beach Park sa Dahican, Mati City bag-ohay lang.

Ang maong tim gidulaan nila police officers Floricel Magsigay ug Princess Oliveros, nga nakalingkawas sa University of Mindanao (UM) Tagum, 21-15, 18-21, 15-12, sa finals sa maong torneyo nga kabahin sa pagselebrar sa 51st Araw ng Davao Oriental.

Ang magpares Magsigay-Oliveros, kinsa bag-ohay lang nakigtigi sa Iligan City, mipalukapa sab sa UM Davao sa semifinals.

Gipalagpot sab nila ang San Pedro College-Davao Oriental and Ateneo de Davao University High School ug City of Mati atol sa eliminasyon.

“One day lang mi naka-practice kay gikan pa mi ug Iligan so wala mi naka prepare ahead of time,” pahayag ni Magsigay atol sa pakighinabi kaniya sa telepono.

Dugang niya nga ang pagdaug sa kompetisyon wa nila gilauman.

Nagpasalamat sab sila kang Police Chief Superintendent Manuel Gaerlan, Regional Director of Police Regional Office 11 sa pagtugot sa ila pagduwa. (Marizz R. Perez)